म धर्मी छु, म निष्ठावान छु, र म मानिसको अन्तस्करण छानबिन गर्ने परमेश्‍वर हुँ! को साँचो र को झूटो हो भन्ने कुरा म तुरुन्तै प्रकाश गर्नेछु। हतोत्साहित नहो; सबै थोकले मेरो समयअनुसार काम गर्छन्। मलाई कसले इमानदारीका साथ चाहन्छ, र कसले चाहँदैन—म तिमीहरूलाई पालैपालो बताउनेछु। तिमीहरूले धित मरुञ्जेल खाने र पिउने र मेरो उपस्थितिमा मेरो नजिक आउने कुरामा मात्रै ध्यान दियौ भने, मेरो काम म आफै गर्नेछु। तीव्र नतिजाका लागि ज्यादै व्यग्र नहोओ; मेरो काम झट्टै सम्पन्न गरिहाल्न सकिने कुरा होइन। त्यसभित्र मेरा चरणहरू र मेरो बुद्धि छन्, त्यसै कारणले मेरो बुद्धि प्रकट गर्न सकिन्छ। म तिमीहरूलाई मेरा हातहरूद्वारा गरिने काम देखाउनेछु—त्यो हो, दुष्टलाई दण्ड र असललाई इनाम दिनु। म सबै मानिसप्रति पूर्णतया निष्पक्ष छु। जसले मलाई सच्चा रूपमा प्रेम गर्छ, म उसलाई सच्चा रूपमा प्रेम गर्नेछु, जसले मलाई सच्चा रूपमा प्रेम गर्दैन, ऊप्रति मेरो क्रोध सधैँ रहनेछ, ताकि म नै साँचो परमेश्‍वर, मानिसको अन्तस्करण छानबिन गर्ने परमेश्‍वर हुँ भनेर उसलाई सधैँभरि याद रहोस्। अरूका आँखाअगाडि एउटा र पिठिउँपछाडि अर्को व्यवहार नगर्; तैँले गर्ने सबै कुरा म स्पष्ट रूपमा देख्दछु, र तैँले अरूलाई मूर्ख बनाउन सके पनि मलाई मूर्ख बनाउन सक्दैनस्। म यो सबै स्पष्ट देख्दछु। तैँले कुनै पनि कुरा लुकाउनु सम्भव छैन; सबै थोक मेरै हातमा छन्। आफैलाई धेरै चतुर र आफ्ना क्षुद्र साना युक्तिहरूमा अत्यन्तै निपुण नठान्। म तँलाई भन्छु: मानिसहरूले जति धेरै योजनाहरू रचे पनि, चाहे ती हजारौँ वा दसौँ हजार भए पनि, आखिरमा ऊ मेरो हत्केलाबाट उम्कन सक्दैन। सबै थोक र सबै घटनाहरू मेरा हातद्वारा नियन्त्रित छन्, एक जना व्यक्तिको त कुरै नगरौँ! मलाई छल्ने वा मबाट लुक्ने कोसिस नगर्, फुस्लाउने वा लुकाउने कोसिस नगर्। के मेरो महिमायुक्त अनुहार, मेरो क्रोध र मेरो न्याय सार्वजनिक रूपमा प्रकट गरिएको तैँले अझै नदेखेको हुन सक्छ? जसले मलाई सच्चा रूपमा चाहँदैन, म उसलाई तुरुन्तै र दया नदेखाई न्याय गर्नेछु। मेरो कृपा अन्त्य भएको छ; अब केही बाँकी छैन। अब उप्रान्त पाखण्डी नबन्, र तेरा असभ्य र लापरवाह चालहरूलाई बन्द गर्।

हे मेरो छोरो, ध्यान दे; मेरो उपस्थितिमा धेरै समय बिता अनि म तँलाई साथ दिनेछु। नडरा, मेरो दुईधारे तरवार अघि सार्, र—मेरा अभिप्रायहरूअनुसार—शैतानसित अन्तिमसम्मै लडाइँ गर्। म तँलाई सुरक्षा दिनेछु; कुनै चिन्ता नगर्। लुकाइएका सबै कुरा खोलिनेछन् र प्रकट गरिनेछन्। म सूर्य हुँ जसले प्रकाश दिन्छ, र निर्मम तरिकाले सबै अन्धकारमा ज्योति छर्छ। मेरो न्याय पूर्ण रूपमा आइसकेको छ; मण्डली लडाइँको मैदान हो। तिमीहरू सबैले आफूलाई तयार पार्नुपर्छ र आफ्नो सम्पूर्ण सत्त्वलाई अन्तिम, निर्णायक लडाइँप्रति अर्पित गर्नुपर्छ; म तँलाई अवश्यै सुरक्षा दिनेछु ताकि तैँले मेरो लागि असल र विजयी लडाइँ लड्न सकेस्।

सावधान हो—आजकाल मानिसहरूको हृदय छली र बुझ्न गाह्रो हुन्छ; तिनीहरूलाई भरोसा गर्न असम्भव छ। म मात्र पूर्ण रूपमा तिमीहरूका लागि हुँ। ममा कुनै छल छैन; बस ममाथि भरोसा राख्! मेरा छोराहरू त्यो अन्तिम, निर्णायक लडाइँमा अवश्यै विजयी हुनेछन्, र शैतान निश्चय नै मरणान्त सङ्घर्षका लागि बाहिर आउनेछ। नडरा! म तेरो शक्ति हुँ, र म तेरो सबै थोक हुँ। अत्यधिक चिन्ता नलि—यो सम्हाल्न तँलाई भारी पर्छ। मैले पहिले नै भनेको छु, म अबदेखि तिमीहरूलाई बाटोमा तान्ने छैन, किनकि समय निकै कम छ। मसँग तिमीहरूलाई कानमा समातेर सचेत गराउने समय नै छैन—यो सम्भव छैन! तँ लडाइँका निम्ति आफ्ना तयारीहरू मात्र पूरा गर्। म तेरो पूर्ण जिम्मेवारी लिन्छु; सबै कुरा मेरै हातमा छन्। यो मृत्युसम्मकै लडाइँ हो, र एउटा न एउटा पक्ष नष्ट हुने निश्चित छ। तर तँ यो कुरामा स्पष्ट हुनुपर्छ: म सधैँ विजयी र अपराजित छु, र शैतान अवश्यै नष्ट हुनेछ। यो मेरो प्रक्रिया, मेरो काम, मेरो इच्छा, र मेरो योजना हो!

काम भइसक्यो! सबै काम भइसक्यो! डरपोक वा भयभीत नहो। म तँसँग, र तँ मसँग भएपछि, हामी सधैँभरि राजा हुनेछौँ! एक पटक बोलेपछि मेरा वचनहरू कहिल्यै बदलिँदैनन्, र तिमीहरूमाथि चाँडै नै घटनाहरू आइपर्नेछन्। होसियार हो! तैँले प्रत्येक हरफलाई राम्ररी मनन गर्नुपर्छ; अबदेखि मेरा वचनहरूका बारेमा अस्पष्ट नहो। तँ तिनका बारेमा स्पष्ट हुनैपर्छ! तैँले याद राख्नुपर्छ—मेरो उपस्थितिमा अझ बढी समय बिता!