१

सत्यता पछ्याउनु भनेको के हो? पूर्णतया परमेश्‍वरका वचनअनुसार र सत्यतालाई आफ्नो मापदण्डका रूपमा लिएर मानिस र कामकुराहरूलाई हेर्नु, र सोहीअनुरूप आफूलाई आचरणमा ढाल्नु र कार्य गर्नु। यी वचनहरूलाई तिमीहरूले हृदयमा कुँदेर राख्नुपर्छ, र तिमीहरूको जीवनको आदर्श-वाक्यका रूपमा प्रयोग गर्नुपर्छ। अनि यी वचनहरूलाई प्रायजसो झिकेर मनन गर्ने गर्; र यी वचनहरूसित तेरो व्यवहार, तेरो जीवनको मनोवृत्ति, विभिन्‍न कुराहरूप्रतिको तेरो दृष्टिकोण र तेरो अभिप्राय र लक्ष्यलाई दाँजेर हेर्। त्यसपछि तैँले तेरो साँचो स्थिति र तैँले प्रकट गर्ने स्वभाव सार के रहेछ भनेर स्पष्ट रूपमा थाहा पाउन सक्नेछस्। त्यसपछि, यी वचनहरूसँग तुलना गर्, र तिनलाई तेरो अभ्यासका सिद्धान्त अनि तेरो अभ्यासको मार्ग र दिशाका रूपमा ली। जब तैँले यसरी पछ्याउँछस्, र जब तँ यी वचनहरूमा पूर्णतया प्रवेश गर्न र यी वचनअनुसार जिउन सक्षम बन्छस्, तब तैँले सत्यता पछ्याउनु भनेको के हो, बुझ्नेछस्। स्वाभाविक रूपमै, जब तँ यी वचनहरूको वास्तविकतामा प्रवेश गर्छस्, तँ सत्यता पछ्याउने मार्गमा हिँडिसकेको हुनेछस्।

२

जब तँ सत्यता पछ्याउने मार्गमा हिँड्छस्, तँ तेरो भ्रष्ट स्वभावको बाधा, नियन्त्रण र बन्धनहरूद्वारा झन्झन् कम सताइनेछस्। तँलाई तँसित आफ्नो भ्रष्ट स्वभाव समाधान गर्ने मार्ग छ, र आफ्नो मुक्तिको आशा छ भन्‍ने महसुस हुनेछ। तब मात्र तँलाई परमेश्‍वरमा साँचो विश्‍वास गर्ने अनि उहाँका वचनहरू खाने र पिउने जीवन सन्तुष्टदायी, शान्तिमय र आनन्दप्रद लाग्‍नेछ। यत्तिका वर्ष परमेश्‍वरमा विश्‍वास गरेपछि, सत्यतालाई प्रेम नगर्नेहरूलाई जीवन सधैँझैँ खोक्रो छ, र आफ्नो लागि भरपर्दो केही पनि छैन भन्‍ने लाग्छ। प्रायजसो तिनीहरूलाई भ्रष्ट स्वभावमा जिउनु साँच्चै पीडादायी रहेछ भन्ने समेत लाग्छ, र तिनीहरू त्यो फाल्न त चाहन्छन् तर सक्दैनन्। तिनीहरूलाई सधैँ आफ्नो भ्रष्ट स्वभावले नियन्त्रण गरेको, जकडेको र बाँधेको हुन्छ। यो सबले तिनीहरूलाई साह्रै व्याकुल पार्छ, तैपनि तिनीहरूसँग पछ्याउने कुनै मार्ग हुँदैन। तिनीहरूका यी दुःखका दिनहरू कहिल्यै हट्दैनन्। यदि तिनीहरू सत्यता स्विकार्न र मुक्ति प्राप्त गर्न सक्छन् भने, यी दुःखका दिनहरू पनि बितेर जानेछन्।

—वचन, खण्ड ६। सत्यताको पछ्याइबारे। सत्यता पछ्याउनु भनेको के हो (२)