१

परमेश्‍वरप्रतिको प्रेम पछ्याउने व्यक्तिका रूपमा, परमेश्‍वरका मानिसमध्ये एक बन्‍न राज्यमा प्रवेश गर्नु तिमीहरूको साँचो भविष्य, र सबैभन्दा मूल्यवान् र अर्थपूर्ण जीवन हो; तिमीहरू जत्तिको आशिषित कोही पनि हुँदैन। किनकि आज तिमीहरू परमेश्‍वरका लागि जिउँछौ, र परमेश्‍वरको इच्छा पछ्याउनका लागि जिउँछौ। यही कारणले गर्दा नै म भन्छु कि तिमीहरूको जीवन सबैभन्दा अर्थपूर्ण छ। परमेश्‍वरद्वारा चुनिएका मानिसहरूको यो समूहले मात्रै सबैभन्दा अर्थपूर्ण जीवन जिउन सक्छन्: पृथ्वीमा अरू कोही पनि त्यस्तो मूल्य र अर्थको जीवन जिउन सक्षम छैन।

२

तिमीहरू परमेश्‍वरद्वारा चुनिएका, र परमेश्‍वरद्वारा नै उत्थान गरिएकाले, र, त्यसमाथि, परमेश्‍वरको प्रेमका कारण, तिमीहरूले साँचो जीवन बोध गरेका छौ, र सबैभन्दा मूल्यवान् हुने तरिकाले जिउन जान्दछौ। यो तिमीहरूले राम्ररी पछ्याउने भएकाले होइन, बरु परमेश्‍वरको अनुग्रहका कारण हो; तिमीहरूको आत्मिक आँखा खोलिदिने परमेश्‍वर नै हुनुहुन्थ्यो, र तिमीहरूलाई उहाँ सामु आउने सौभाग्य प्रदान गर्दै, तिमीहरूका हृदय उत्प्रेरित गर्ने परमेश्‍वरका आत्मा नै हुनुहुन्थ्यो। यदि परमेश्‍वरका आत्माले तिमीहरूलाई अन्तर्दृष्टि नदिनुभएको भए, परमेश्‍वरबारे के प्रेमिलो छ भनी तिमीहरूले देख्‍न सक्नेथिएनौ, न त तिमीहरूले परमेश्‍वरलाई प्रेम गर्न नै सम्‍भव हुनेथ्यो। परमेश्‍वरका आत्माले मानिसहरूको हृदय उत्प्रेरित गर्नुभएकाले नै तिनीहरूको हृदय परमेश्‍वरतर्फ फर्केको छ।

—वचन, खण्ड १। परमेश्‍वरको देखापराइ र काम। परमेश्‍वरको सबैभन्दा नयाँ कामलाई चिन र उहाँका पदचापहरू पछ्याऊ